განსაზღვრულია ნაკვეთის განვითარების პარამეტრები, რომლის საფუძველზეც მომავალ მესაკუთრეს შეეძლება ინდივიდუალური პროექტის მომზადება და მშენებლობის ნებართვის მიღება. შემუშავდება სააგარაკე უბნის დეტალური გენერალური გეგმა, რომელიც უბნის იერსახის შენარჩუნებას ემსახურება.

შენობების მაქსიმალური სიმაღლე უნდა განისაზღვროს ქვემოთ მოცემული ჭრილების მიხედვით. მიწისზედა სართულების რაოდენობა არ უნდა აღემატებოდეს 2 სართულს (მანსარდის სართულის ჩათვლით).

შენობის მაქსიმალური სიმაღლე ბრტყელი გადახურვის შემთხვევაში არ უნდა აღემატებოდეს 7.5 მ-ს.

შენობის მაქსიმალური სიმაღლე ქანობიანი სახურავის შემთხვევაში, კეხის წერტილში არ უნდა აღემატებოდეს 10 მ-ს.


სართულიანობა და მაქსიმალური სიმაღლე ითვლება შემდეგი პრინციპით:
1. იმ შემთხვევაში როცა მიწის ნაკვეთი მდებარეობს მისასვლელ გზასთან მიმართებაში მაღალ ნიშნულზე - რელიეფის დაბალი ნიშნულიდან.
2. იმ შემთხვევაში როცა მიწის ნაკვეთი მდებარეობს მისასვლელ გზასთან მიმართებაში დაბალ ნიშნულზე - რელიეფის მაღალი ნიშნულიდან.


შენობის მაქსიმალურ სიმაღლეში და სართულიანობაში არ შედის:
1. ბრტყელი გადახურვის შემთხვევაში სახურავზე ასასვლელი კიბის უჯრედი
2. საკვამური ან სავენტილაციო შახტა

თითოეულ მიწის ნაკვეთზე შენობის განთავსება უნდა მოხდეს დადგენილი რეგულირების წითელი ხაზების ფარგლებში. აღნიშნულ რეგულირების ხაზებს არ უნდა გასცდეს შენობის ძირითადი ნაწილის (მიწისზედა სათავსების) არც ერთი ელემენტი.
 

რეგულირების წითელი ხაზების მიღმა შეიძლება მოეწყოს შემდეგი ნაგებობები:

1. საცურაო აუზი
2. მსუბუქი კონსტრუქციის ფანჩატური
3. ღია ან დახურული ავტოსადგომი
4. მიწისქვეშა სათავსები
5. ერთ სართულიანი დამხმარე შენობა

შენიშვნა: ნებისმიერი ობიექტი, რომელიც განთავსდება რეგულირების ხაზის მიღმა მოშორებული უნდა იყოს სამეზობლო საზღვრიდან მინიმუმ 1 მ-ით.

შენობის ფასადის მოსაპირკეთებელი მასალები:

ბუნებრივი ქვა
ფიქალი
ხე
ლითონი
აგური
ფასადის კომპოზიტური ან ბეტონის პანელები
(შესაფერისი ფერის და მასალის)

შენობის ფასადის მოსაპირკეთებელი ელემენტები:
 

1. დაუშვებელია მკვეთრი ფერების გამოყენება ფასადის მოპირკეთებისათვის.
2. შენობის ყველა ფასადი დამუშავებული უნდა იყოს მაღალი არქიტექტურული მოთხოვნებით, და სამეზობლო საზღვრის მიმართულებით მდებარე ფასადებს არ უნდა დაეთმოს ნაკლები ყურადღება.

შენიშვნა: ზემოთ აღნიშნულის გარდა ნებისმიერი სხვა მასალისა თუ ელემენტის გამოყენების შემთხვევაში გადაწეყვეტილება (პროექტის სახით) უნდა შეთანხმდეს ტერიტორიის ადმინისტრაციასთან / საპროექტო ჯგუფთან.

შენობების ბრტყელი გადახურვის მოპირკეთების მასალა შეზღუდული არ არის.
 

შენობების ქანობიანი სახურავის შემთხვევაში დასაშვებია შემდეგი მასალების გამოყენება:
 

კრამიტი
ფიქალი
თუნუქი
თუთია
ხე
მწვანე სახურავი
შინგლი (ასფალტის ყავარი)
მინა

დაუშვებელია მკვეთრი ფერის სახურავის მასალის გამოყენება (წითელი, მწვანე, ლურჯი)

ტერიტორიის შემოღობვის მთავარი პრინციპები:
 

შენობების წინა ეზო (გზის მიმდებარე ნაწილი), წარმოადგენს უბნისთვის მნიშვნელოვან არეალს ვიზუალური თვალსაზრისით. შესაბამისად კერძო მესაკუთრეების მიერ მოწყობილ წინა ეზოს კეთილმოწყობის ხარისხზე, მნიშვნელოვნად იქნება დამოკიდებული უბნის სამომავლო იერსახის ხარისხი. გამომდინარე აქედან, ქუჩის პირა ღობე უნდა იყოს მაქსიმალურად გამჭვირვალე.

შენიშვნა: ღობის და ჭიშკრის დიზაინი აუცილებლად წინასწარ უნდა შეთანხმდეს ტერიტორიის ადმინისტრაციასთან / საპროექტო ჯგუფთან.
 

ღობის სიმაღლედ განისაზღვრა 170 - 180 სმ (არსებული გრუნტიდან).
ის ორი ნაწილისგან შედგება:

1. ზედა ნაწილი
სიმაღლე: 100 სმ.
დაშვებული მასალები: მეტალის ფირფიტები, ხე

2. ფუნდამენტი
სიმაღლე: 80 სმ.
დაშვებული მასალები: ბუნებრივი ქვა, აგური